نظرية اللطخ و المزة

كتير جدا بنشوف المنظر ده
واحد أقل ما يوصف بيه انه "لطخ" من "ألطاخ" الزمن
Super Mozza و ماشي مع واحده من فصيلة
تفسير المعضله دي ليه حلين
الأول .. ان أخونا لطخ فعلا و ان المزه بتعمل بيه عملية غسيل أموال
التاني .. ان اللطخ نسي انه لطخ .. و اقنع نفسه انه براد بيت لدرجة انه صدق كده و مش هو بس .. كمان المزة اللي معاه
لو كان الحل التاني صحيح اظن اللطخ من حقه يطلعلك لسانه و يلعب حواجبه كمان
لانك كان ممكن تبقى مع نفس المزة .. بس انت فضلت تكبر في عيوبك و خفت .. و هو نسيها
أرجو تكون الفكرة وصلت بعيدا عن المزة

Arrivederci !

حقوقك يا بني ادم

اكيد تسمع عن حقوق الانسان
بس احتمال كبير تكون زي معظم الناس و ماتكونش عارف هي ايه بالظبط
عن نفسي مكنتش عارفها لحد ما اتفرجت عالفيديو الجامد ده




adiós !!

نص كيلو ابداع لو سمحت

ليه ديما أول ما الواحد يحس انه بيعرف يعمل حاجه معينه بشكل جميل فيه ابداع

الضغوط بتزيد عليه لدرجة انه ممكن يعملها بشكل سيء جدا

من وجهة نظري لان الابداع مابيجيش بالطلب

و اول مالواحد "بيحس" انه مبدع

بيحمل نفسه فوق طاقتها

يا ريت ماتطلبش من حد انه "يبدع" حتى لو كان الحد ده هو نفسك

سيب كل حاجه تطلع وقت ما هي عايزه .. و تقبل انك عمرك ما هتبقى مبدع طول الوقت

さようなら !

أصله مش شريط فيديو

لما يكون فيه مكان معين ليك فيه زكرى حلوة .. مع حد بتحبه او يمكن لوحدك

اياك تغلط الغلطة اللي كلنا بنغلطها .. و ترجع تروح نفس المكان مع نفس الاشخاص و تحاول تكرر كل حاجه كنت بتعملها

عشان تحس بنفس الاحساس الجميل بتاع زمان

صدقني عمرك ما هتحسه تاني .. بالعكس ممكن تتخنق لان توقعاتك قلت عن الواقع اللي انت لقيته لما حسيت ان الموضوع عادي يعني

و ان جمال اللحظة كان ساعتها مش دلوقتي

الاحسن من كل ده .. انك تروح مكان جديد

و تسيب الدنيا تعمل سحرها .. و تعمل زكرى جديده

bye

يا ريت نبطل خيال علمي

الناس لما بتحس ان عندها نقص معين .. بيبقى قدامها حلين

الحل الأول وده الأصعب

انك تقعد مع نفسك و تعترف اولا قدام نفسك انك عندك نقص في حاجه معينة و تشوف ممكن تظبط الموضوع ده ازاي .. و تقعد تعافر مع السنين بقى لحد ما تظبطه .. او ماتظبطوش

اما الحل التاني و ده الأسهل

انك تقنع نفسك بان كل اللي حواليك انيل منك في كل حاجه , و تقعد ليل نهار تتريق عليهم و تتهمهم بجميع انواع النقص اللي في الدنيا .. على الاقل عشان تبقى قدام نفسك أحسن الوحشين

الحل التاني لزيز و ممتع .. زي كل أفلام الخيال العلمي

see ya !

اصعب من الفشل

كتير أوي بيبقى نفسنا نعمل حاجه و بنحلم بيها و بنتخيل نفسنا و احنا بنحققها و احنا في منتهى السعاده .. لكن بنحب ديما نأجلها لاننا خايفين نفشل فيها و تبقى حاجه جديدة في ليستة الفشل اللي مليانه حاجات اصلا .. بدل ما كانت حلم جميل بنحلم بيه كل شوية بيدينا امل ان بكره هيبقى احسن .. لما نحقق الحاجه دي

لكن تخيل ان العمر عدى و فضلت طول عمرك كده .. بتحققها في خيالك بس

هيكون احساسك ايه و انت فرصتك عدت .. و ماحاولتش حتى تعملها ؟؟

صدقني اصعب من الفشل بكتير

ايه رايك تبدا تعمل الحاجه دي دلوقتي ... حالا

au revoir !

سيبونا في حالنا بقى

بستغرب اوي من ناس بتعترض و تتريق لما تشوف اي حد بيحاول يكسر روتين حياته زي انه يسافر مكان ما راحوش قبل كده او يعمل اي حاجه جديده

و بعد كده يرجع يلعن ظروف الحياة الكئيبة الممله الروتينية .. مع انه قادر يعمل كده .. سواء بوقته أو بفلوسه

اوعى تبقى كده .. على الاقل لو بتحب الروتين سيب اللي بيكرهوه في حالهم هما مش محتاجين نصايحك الذهبيه

سلام

مش لازم تبقى الأحسن

ليه لازم تبقى الاحسن ديما .. وسط صحابك او عيلتك او في اي مكان ؟

ليه ما تفكرش انت عايز ايه بالظبط من الدنيا و ازا وصلتله تعتبر نفسك احسن واحد في الدنيا ؟؟

لو لقيت نفسك بتدايق كل ما تسمع ان حد عمل حاجه انت ماعملتهاش و بقى "احسن منك" فرمل شوية وشوف "انت" عايز ايه

سلام

المقدمة .. و اللي اوله شرط اخره نور يا خوانه

لاني انسان بطبيعتي ما بحبش اللت و العجن الكتير ( الا في مدونتي التانية بصراحة ) فانا قررت اني هعمل المدونة دي عشان
اكتب فيها اي افكار سريعة بتخطر على بالي و بحس اني عايز اقولها بس معنديش وقت او مكسل او لاي سبب .. و في نفس الوقت حاسس ان الموضوع كده هيبقى اظرف كتير .. المختصر المفيد علطول .. و خلي بقى اللت و العجن في اختلاف

الفكرة خطرت على بالي لما صديقي محمد صاحب مدونة استراحة قالي انه بقى بيكتب مواضيع مختصرة اوي لانه معندوش وقت .. قمت قلت انا بقى هعمل مدونة مخصوص لكده .. أفكار سريعة عالماشي بس ممكن تفرق كتير اوي اكتر من موضوع طويل ما تطلعش منه بحاجه

هنا هتلاقي افكار تخص كل شيء في الدنيا .. طبعا ماقدرش اوعدك ان كل الافكار اللي هتقراها هتنورلك حتة جديدة في دماغك .. بالعكس ممكن جدا تلاقي نفسك بتقول ما حانا عارفين انت جبت التايهه يعني .. و مقدرش اوعدك انك هتتفق مع كل الافكار اللي هنا و تلاقي كل الناس اللي عمالة تعلق ( ده ازا لقيت حد بيعلق اساسا) بتعلق تعليقات زي الله عليك و انت مبدع و انت رائع و تسلم كيبوردك (دي بالزات بكرها مش عارف ليه) و حضرة المدح المحمدي اللي بتحصل في معظم المدونات التانية

برضه مقدرش اوعدك انك هتقرا كلام تقيل و عميق لواحد من طبقة المثقفين اللي في البلد او اللي ليهم بلوجات جامده كده و كلها لوح فنية و اشعار عميقة جدا لدرجة انك احتمال كبير اوي ماتفهمهاش (: .. لاني بمنتهى البساطه مش واحد منهم .. انا مجرد واحد قاعد في بيتهم و فاتح مدونة اسمها افكار سريعة

من الاخر كده انصحك بعدم متابعة المدونة (:

طبعا بهزر ما تفرحش اوي .. يا ريت تيجيي هنا كل يوم و تجيب صحابك كمان

اللي اقدر اوعدك بيه هنا انك مش هتلاقي افكار من نوع لا حياة مع اليأس و لا يأس مع الحياة و تحدى زاتك و بطل سجاير و اشرب اللبن و الشعارات الفارغه دي

و كمان الي اقدر اوعدك بيه ان صاحب المدونة نفسه يشارك كل الناس بكل الافكار اللي هو شايفها من وجهة نظرة حلوة و انه نفسه كل الناس برضه تشاركه كل الافكار اللي هي شايفاها حلوة من وجهة نظرها وده كله يحصل بسرعه من غير لت و لا عجن ( و لا مدح محمدي )


و دي دعوه مفتوحة لاي بني ادم في العالم بغض النظر عن البلد او الجنس او الدين او اي حاجه تانيه انه يشاركني في كتابة افكار المدونة دي

سلام